Irutxuloko Hitza

Pilarko auzunea 'inauguratzeko' festa

Martutene

Berritze lanak bukatu dituztela ospatzeko auzotarrek eta Udalak jaia egingo dute etzi.

erredakzioa

Pilarko auzuneko lanak bukatu dituztela ospatzeko festa egingo dute etzi Martutenen. Auzo elkarteak udal ordezkariak, auzotarrak eta auzunean lanean ibilitako langileak elkartu nahi dituzte.

11:30ean auzoko trikitilariek kaleak alaituko dituzte. Jarraian txistularien txanda izango da eta auzotarrek eta udal ordezkariek berritutako Pilarko auzunearen inaugurazio ekitaldia egingo dute eta hamaiketakoa izango da. Inaugurazioa eta gero herri jokoak izango dira eta goiz osoan zaharberritze proiektuaren argazkiak izango dira ikusgai. Pilarko auzuneko lanak iazko udaran hasi ziren. Oinezkoentzako gune bihurtu dute auzoa, nahiz eta ibilgailuak ere sar daitezkeen. Hainbat zuhaitz ere jarri dituzte eta autoentzako sarrera-irteerak aldatu dituzte. Ikastolaren ondoko kalean, koskadun zebrabideak jarri dituzte ibilgailuak motelago igarotzeko.